Samichlaus-Sprüchli

Sami, Niggi, Näggi | Für Kinder bis 4 Jahre

«Sami Niggi, Näggi, hinder em Ofe stegg i, gimer Nuss und Bire, so chumm i wieder füre.»

 

Mis Seckli? | Für Kinder ab 4 Jahre

Samichlaus du grosse Ma,

dörf ich ächt mis Seckli ha?

Ich bin ganz lieb xi s ganze Jahr

chasch mer s glaube da isch wahr.

 

Samichlaus ich hett en Wunsch | Für Kinder ab 5 Jahre

Samichlaus ich hett en Wunsch:

Wänn du dänn zu öis hei chunnsch

wett ich mit dir use gah

und e chli zum Esel schtah

wett sin Chopf i’d Arme näh

und em e chli z’Ässe gäh

 

Es Hüüsli im Tannewald

Es Hüüsli stoht im Tannewald, 

zmitzt im verschneite Gländ, 

nur Tierli chömed dra verbi, 

wenn's öppis z'Frässe wänd. 

De Schmutzli und de Samichlaus 

füllet jede Tag ufs neu 

s'Fuetterchrippli hinterm Huus 

mit feinem, frischem Heu. 

Min Esel, d'Reh und d'Hirsche 

frässed gärn dervo 

und was derbi uf d'Erde fallt, 

das isch für d'Häsli do. 

Jetz müemer aber pressiere, 

es bliibt eus nümm viel Ziit, 

de Wäg iä Stube vo de Chind 

isch streng und ziemli wiit. 

Mir händ die warme Stiefel a 

und chnöpfet d'Mäntel zue. 

Chumm, Schmutzli, gäll mir zwe 

händ hütt no sehr viil z'tue.

In der Schulzeit wird oft gedichtet und gereimt,  

nicht nur für den Samichlaus sind diese Versli gemeint.

Der Zauber der Weihnachtszeit getragen durch Worte, 

für Kinder jeden Alters haben wir die passende Sorte. 

 

Samichlaus du guete Maa | Für Kinder ab 7 Jahren

Samichlaus du guete Maa

ändlich bisch du wieder da.

Chonsch cho luege, was ich mache

wien ich spiele, singe und lache.

Tuesch mich lehre, s’ Härz zverschänke

und e chli a anderi dänke.

Nur so bin ich sälber froh

unds Christchind cha zumer cho.

 

Es Liechtli brännt im Tannewald | Für Kinder ab 8 Jahren

Es Liechtli brännt im Tannewald

Was söll äch das bedüte?

Chunnt ächt de Samichlaus scho bald?

Ich ghöre äs Glöggli lüüte.

Es isch de Chlaus mit schwärem Schritt

Chömed lueged gschwind

Er träit en Sack voll Nüssli mit

Für alli, alli Chind

 

Samichlaus, lueg uf em Tisch | Für Kinder ab 10 Jahren

Samichlaus, lueg uf em Tisch

s chliine Cherzli, wo det isch,

lüüchtet nume wäge dier.

Du und ich und alli mier

freuid üs, dass Chlausziit isch.

Und s chlii Cherzli uf em Tisch

seit, das ganz glii Wienacht isch.

 

De Samichlaus, de Samichlaus | Für Kinder ab 12 Jahren

De Samichlaus, de Samichlaus,

so tönts vo Huus zu Huus.

Gar mängem Chind chlopft s’Herz so fest

und luegt zum Fenster uus.

Jetzt polderets dur d’Stege-n-uuf,

was hed er ächt im Sinn?

Er treit en Sack so schwer und grooss,

was tuusigs isch da drin?

De Sack de nimmt er immer mit

für d’Chinde grooss und chlii.

De braave leert er d’Nusse druus,

die böse steckt er drii.